Tuu Kot aan nëme .
un këpt tëm hërlichkheet .

Daniela (12): Ich sin nii in te xuul kang, mayn eltre hon mich in te xuul kexikt un ich sin froo.

Daniel (43) Ich hon ti mechanixe ingenieurxaft in te Xwitserlant kemacht, awer, weeche ti kris woo ti welt sich am khimere is, sin ich yets en banaane pauer im Brasil .

Betsy (42): Un ich sin een krist un een froo fraa un muter. En wersikel woo mich petreft: Was is te phunkt fon te kans welt se kriin un tayn seel ferliire? Orer was tuut een man fer sayn seel këpe?

Daniel: Iwerhëm: ich sin khee mitkliiter fon khee kemaynt, ich waar aus kexlos wayl ich tsuu unaafhängich waar. Ich hon fersuucht Kot noo keen oone sich fon te mënxliche orkanisatsioone ap hoole.

Tuu weest, te Kot woos tuu ferwort host, is net te woere Kot, awer en xlecht kemacht karikatuer fon iim. Satanaas, te Taywel, woo friier en ëngel fon Kot waar, awer woo fom himel raus keworef kep waar, un woo ti welt rechiirt, is tee woo Kot wii arbitraar un xlëcht pehantelt, woo saat: tuu mich aan heere ore ich tuun tich im fayer xmayse. Te faynt fom kuute is tee woo tas pilt macht. Tii is ferkheert. Es waar fer tiise ferklaychung se richte tas Kot sayn Soon kexikt hot, fer ti wëlt tsayche wii Ëyer is. Kristus hot mich ferxproch: Tee woo mich kesiin hot, hot te Fater kesiin wii eyer sayn ëyertliche misioon pexrip hot, hot Yeesus kesaat: “Te Hërkot sayn kayst is uf mich kesalpt kep, wayl Ëyer hot mich kesalpt fer ti aarme se preetiche, Ëyer hot mich kexikt fer ti ferxtorpene hërtse se heele, . fer preetiche tas ti kefangne ​​fray kemacht wëre, ti pliinte siin lose un tii woo unertrikung sin, fray mache.” Tas waar sayn aarwayt. Tee is um kang un hot kuutes kemacht, tii woo fon Satanaas unertrikung unertrikung waare, keheelt. Kot hot ti welt soo fiil keliipt tas er wilich waar sich fon sayn eensiche Soon ap lënke fer en riskant misioon: 30 yoer uf te Eyert leewe, mit em riskant tas Yeesus aach mit te sint ferfluucht wërt, un tee fer imer ferliire teet. Tas ales tas wën te plans funktsiooneere teet, khënte mer tas eewiche leepe hon.

Daniel: Wii ich 17 yoer alt waar, hon ich mich selepst kesaat: Ich klaape tas Kot eksistiirt un tas tee liip is. Awer fiile welt relichioone klaape aan een sort Kot. Khan ich wërklich traue tas ti Piipel Kot sayn wort is? Khan ich mayn leepe uf tiise xtële paue? Tan, hon ich welche pewaysunge kefun woo tsayche tas ti Piipel Kot sayn puuch is:

> Ti profetsiie hon sich erfiilt: Tas kapitel iwer ti xtaatue fon Taniël 2 hot ti nookhomer fon te rechiirunge profetsiirt un hot se pexrip, eep se eksistiirt hon. Ferklaych tas mit een ensiklopetii orer een kexicht puuch, un tuust siin tas ti Piipel hot profetsiirt tas uf xtaye un runer kefal fon te rechiirunge fon Persia, Kreeka un RomaUn aach foer heyer kesaat wan te Mesias khome teet. Tas is kraat mit Yeesus Kristus erfiilt kep.

> Ti arkeolokii hot ti woerheet fon te Piipel pekhant kemacht.

— Rol fon te Toote Meer, woo foer Kristus kexrip kep sin. Tii tuun ti kenaukheet un konsistens fon te hepreeyx Piipel torich ti tausente yoere pewayse. Te Isaiias rol fon tswaay tausent yoere tsurik is praktix tas selwiche woo mer hayt in te Piipel hon.

— Fiile sientiste hon kemënt tas Tawi en mythos waar, woo nii eksistiirt hot. Tas “Stele fon Tel Dan” kefun kep is, woo fom 9. yoer hunert foer Kristus khom is, un woo tas “Haus fon Tawi” erinert.

— Te moapixe xteen “Mesha Stele”, fon 840 foer Kristus, woo im Jordaan kefun kep waar. Es xprecht iwer ti kewinunge woo te kheenich fon Moap iwer ti israelite kewun hot, un tas petayt tas ti piiplix kexicht woo in 2 Reis 3 xteet, xprecht aach iwer te israelite Kot Yeehoowa orer Yau, woo 840 yoere foer Kristus xteet.

— Un ich khont anere foer pringe, wii te xteen fon Pilatus, ti liste fon te papilioone woo te naame fom kheenich fon Israël erinere, Tawi sayn xtat un te tunnel fon Hesekiias.

> Ti eenheet fon te tëkst. Kexrip fon mee wii fiertseen unerxiitliche layt, in fiile unerxiitliche plëtse, un in unerxiitliche tsayte, yeete teel tuut sich mit te anere ferklayche. Tuu host fiilaycht een Piipel mit soo sorte referënse kesiin. Ti Piipel is een eenheet, ales khomt tsusamer, haupstseechlich wën mer mit teemuut un kepeet xtutiire.

> Ti hoochxuul fon te Piipel: Xlëchte mënxe khonte net ti Piipel xraywe, wayl tii tii ferxprëcht. Tayn standart is hooch, noye un ferlangre. In te selwich tsayt, tuut se net ti feeler fon sayn helfe ferxtekele. Wën es een faprik weyer fer nookhomer se kriin, teet tas sayn persoone ferheere. Awer nee, tas tsaycht fraywilich ti feeler fon te pekhanteste patriarke, profeete un kheeniche.

> Tayn influëns. Wën ti Piipel een mënxlich puuch wëyer, teet se nii tas tings mache woo se in te welt in te yoore kemacht hot. Es hot un hot imer noch en nutslich, heelmitel un transformatiif influëns. Ti yuute, wën mer eerlich sin, sin wii prosperiteet aan kesiin kep wayl se Kot sayn kesëtse noo keen. Te West is hayt tsu taach entwikkelt kep wayl sayn layt ti piiplixe printsiipie fon kerechtichkheet un aarwayt aan kenom hon.

> Te tsayche fon Yeesus Kristus: Ëyer hot imer ti Xrifte tsitiert un pekhant kemacht. Tee hot kesaat: “Ti Xrift khan net ferkëse.” Soo kaar te Genesis hot eyer wii een woere kexicht aan kesiin, tas Kot ti welt in seks taache kemacht hot, ti Sintfluut, usw. Tee hot sayn leepe kefiirt torich ti inlërnunge fom Alte Testamënt.

> Un am ën, te tsayche fon te erleepnis: Proop tich selepst en krist sin, un tuu siist ti kraft fon Kot sayn Wort!

Tuu weest, meyer sin soo froo, ti nutse fon een krist sin sin kreeser wii ti meechliche ferluste. Tuu aach een rees mit tëm Kriatoer erleepe. Tee saat: Ich hon tich mit eewiche liip keliipt, too tefoer hon ich tich mit liip kexlept. Komt tsu mich, al woo xwach sin un woo xwëyer last sin, un ich tuun aych ruu këpe (Mateus 11:28)

Meyer mise tiise Kot fon liip eere, woo fraywilich aan heere un fon te hërts aan piit. Xliislich, is tas kuute oter ti kraft fon Kot fer ti rëtung. Fon was wil Kot uns rëte? Fon unsere sinte. Fer al woo tee aan nëme, kept Kristus ti macht fer Kot sayn khiner wëre un noo lose se sinte. Hayt un yets, wëns tuu klaawe tuust. Awer was is ti sint? Tas wort fom Hër saat tas ti sint is tas kesëts iwertreet, tas is ti eensichst definitsioon woo ti Piipel uns foer xtele tuut. Ti sint is een ëntxlus fer tas kesëts iwertreete. Kot sayn kesëts xteet in te tseen kepoote, ti eyerste fier tsayche wii mer unser liip tsu Kot aus lëye, un ti tsweete taache, ti liip tsu unser neekste. Tan, tas puuch fon Êxodo un Levítico këpe komplët instrutsioone, woo se tuun hon mit tas alte leepe un kesuntheet. Es is een frayt te wile fon unser Kot noo keen, wayl tëm sayn kesëtse sin kerecht un kuut.

Es is wii im ferkheerte weech: ti kesetse un ti restriktsioone tiine fer unser sicherheet. Ti kesets tas te auto imer uf tiise sayt fom autobahn reese mus, un uf te roote lichte xteen, sin net ti kaprite fon te rechiirente, awer ti konkrëse woo unser kuutes tiine. Soo, sin ti kepoote fom Hërkot ferninftich un hon een sint.

Awer mëyer khëne nët torich unser kraft aan heere. Tas wëyer wii wën mer in een xif te Atlantix Oosean iwer keen wole. Meyer mise uns selepst xtërwe lose, un erlaupe tas Kristus in mich leewe un aan heere tuut. Yets yaa, tas is Kot in uns atme lose, un unser xif foran xtele. Tuu Kot aan nëme un tëm ti hërlichkheet këpe. Tuu te Hërkot eere, wayl ti xtun fer sayn kericht is khom. Yeesus is xon neekst tsurik khom, sayn khom wërt in macht un kroos hërlichkheet sin, un yeete au tuut em siin. Yeesus hot kesaat: wii ti flicht fon te oost khomt un fom west khomt, soo wërt te khom fom Mënxe Soon sin. Unser keleechenheet fer tas richtich se mache is tas eensiche leewe woo mer hon, tan khomt tas kericht.

Te poliis woo tich tas tiket kept fer uf te falx sayt fom weech se faare, hot normalmënt khee persoonlich xlechte ketanke keeche mich. Tee is net sayn wuut iwer mich am lose, awer am tas kesëts hale. Soo, tuut Kot ale sayn kriatuere liipe. Wën eyer ti sint fon te welt wëch xaft, mus eyer aach yeete eene woo sich aan ti sint hale tuut, wëch xafe.

Ti seel woo sint macht un khee rëter wil, tuut xtërwe. Ti sint is een iwertreet fom Kesëts. Es is een fon te Hër sayn kepoote xpoote. Yeesus is nët khom fer tas kesëts ënere, tee hot es erfiilt. Yeesus hot wërklich kesetse woo fon te mënxe in kextelt kep sin, ketrof, awer net tas wort fon Kot. Tee hot kesaat: pis te himel un ti ëyert wëch keen, wërt khee xrit orer een xrit fom Kesëts wëch keen. Wayl Kot tuut yeete aarwayt foer tas kericht pringe, un aach yeete ferxtekelt tings, opwool se kuut orer xlëcht sin. (Eclesiastes 12:13)

Es kept kriiche un rumore fon kriiche, tas leewe is soo fray. Wën mer tas leepe ferlase, was fer rekord tuun mer hiner lose? Ti toote kriin khee tsweete xans. Tas wort fom Hërkot saat: ti leewente wise tas se xtërwe tuun, awer ti toote wise niks. Im kraap, woos tuu hin keest, kepts khee aarwat, khee plans, khee khëntnis, khee kluucheet. Soo, yets, wëns tuu leepe tuust, liipe un eere Kot un këp tëm ti hërlichkheet, wayl ti xtun fom kericht is aan kefang.

Tuu aan peete tee woo ti himele, ti ëyert, tas meer un ti waser kwele kemacht hot. Tas erinert uns an tas fierte kepoot: eriner tich fon te sabaat fer tee hayliche hale. Sechs taache tuust tuu xafe un al tayn aarwayt mache, awer te siwete taach is ruu fer Yau tayn Kot. Tuu solst khee aarwat too truf mache… Wayl in seks taache hot Yau te himel un ti Eyert, tas Meer un ales was tat trin is kemacht, un am siwete taach hot eyer keruuft, too tefoer hot eyer em keseechent un kehaylicht.

Satanaas, te Taywel, waar friier een ëngel fom licht im himel, awer ti hoochmuut un ti neetichkheet hon sayn hërts kontroliirt, un tee hot aan kefang Kot sayn kesëts se hase, un hot sich keeche sayn kerechte kepoote kexpiirt. Tee hot kesaat tas ti ëngele nët tiise kesëts prauchte. Un tee hot een aarich mëchtich persoon in Roma influëntsiirt fer een fon Kot sayn kepoote ënere, in te form fon een prowokatsioon. Ti kriste pis im 4. yoer hunert te sabaat kehalt hon, te selwiche taach woo ti yuute kehal hon. Yeesus selepst hot kesaat: peet tas ti fersuuchung nët am sabaat pasiire tuut.

Host tuu xon ketënkt wën in te kompanii woos tuu xafst, ploos een krup fon aarwayter ëntxlist hon tas se te kanse mitwoch fray hon wolte? Wëyer tas net een xwiirichkheet fer ti autoriteet fon te rechiirente?

Soo, hot te Paapst kexikt tas te taach fom ruue solt sich ënere fon samstach, te sipte taach, tsu suntaach, te eyerste taach fon te woch. Un tee hot wii een auslëyung penutst tas Yeesus im eyerste taach fom toot uf kextii is. Ferkes net tas fer ti katolike fon tiise tsayt, te sabaat hot se erinert fon te yuute, woo kehast waare. Fer een tsayt, waare tswaay samstach un suntaach wii hayliche kehalt kep. Awer, mit te yoore, waar te samstach froo un xlecht kexproch kep, wayl tas waar en taach fon restriktsioon, un te suntaach waar en taach fon frooheet, soo tas te eyerxte taach populariteet kriit hot. Tas is im fierte yoer hunert pasiirt. Tas tsweete kepoot fom katekismus, woo saat tas mer net kexnitne pilter mache sole, waar aach raus kehool kep. Un fer ti xeen numer fon tseen kepoote hale, hot te Paapst tas tseente kepoot in tswaay keteelt. Awer tas kesëts fom Hërkot is perfëkt, saat te Psalm 19, yeete ënerung is en affront fer te himel. Ti natuer selepst xpiirt te efekt fon te iwertreet fom Kesëts un fon tëne woo ti ëyert fernichte, saat Isaias: Ti ëyert traurich un ferxwint; ti wëlt wërt xwach un ferxwun; tii tuun ti heechste layt fon te ëyert xwach mache. In woerheet, is tas lant ferxwun weeche sayn inwooner, wayl se ti kesetse iwertreete, ti kesetse ënere un te eewiche pakt xpoote.

Te sipte taach, samstach, is te Hërkot sayn taach, te pëste taach fon te woch, te familye taach. Wën mëyer aach unser aarwayt ferliire, tas tuut tsayche tas mëyer Kot mit unser kanse hërts liipe. Wëyerst tuu wilich fer tayn aarwat ferliire fer tas leewe fon te persoon woos tuu am mëyeste liipe tuust hier uf te Ëyert se rëte?

Unser Kriatoer saat: Soo kaar wën ti mama tas khint woo se liipt ferkeest, tuun ich tich nët ferkëse (Isaías 49:15). Wii khan ich nët soo een Kot liipe?

Wënst tuu tich fer tiise liip ap këpst, wën tayn “selwer” ferproch kept in te antwort uf tiise liip, un wëns tuu aan fangst fraywilich aan heere, khanst tuu fon tayn sinte rayn kemacht wëre, torich ti imersioon ketaaft wëre. Es sympolisiert te toot fer ti welt, un ti akseptans fom leewe woo te Fater kept. Tee hot tiise waser kwele kemacht fer uns fon ale unklike se waser mache.

Een xtroos khint, wees, xlëcht, xlecht kexmëkt, waar in en raych familye aan kenom kep. Tii hot parfum seepe, een hant xteke, een xeen waser phayn un sauwer tsaych kriit. Awer was wën tas khint sich nët fine teet fer een waser trinke orer noo lose sayn alte tsaych aan tsiie? Tës weeche, fer in tëm Raych fom himel rin keen, mise mer ëtliche konditsioone aan nëme. Tee woo sayn sinte ferxtekelt, tuut nii froo sin, awer tee woo se erkhënt un ferliirt, tuut parmhërtslichkheet kriin.

Meyer lose tas wunerliche ebook uf tiise sayt, woo tich xrit noo xrit in te konwersatsioon tsaycht. Wii een persoonlich froyntxaft mit tayn himlixe Fater hon. Hayt, wëns tuu ti xtim fom Fater heerst, tuu net tayn hërts ferxtërke.

Eriner tich: was is te sin fon te kans welt se kriin un tayn seel ferliire?